Навіны і апошнія падзеі. Беларусь

Навіны. Палітыка. Апошнія падзеі. Беларусь. №056

Падзеі

Мін'юст адклікаў пазоў у справе ліквідацыі Саюзу беларускіх пісьменьнікаў. Вярхоўны суд Беларусі спыніў судовую вытворчасьць у справе ліквідацыі Саюзу беларускіх пісьменьнікаў. Такое рашэньне прынятае сёньня паводле хадайніцтва Міністэрства юстыцыі, якое адклікала адпаведны пазоў. Судзьдзя Генадзь Мільто абвясьціў, што гэтае рашэньне канчатковае й абскарджаньню не падлягае.

Тэлефлэшмоб у Берасці. На Берасьцейшчыне адбылася акцыя, мэта якой — абараніць правоў спажыўцоў жыльлёва-камунальных паслугаў. Жыхары Пінску, Берасьця, Лунінца зрабілі сотні тэлефанаваньняў у жыльлёва-камунальныя службы й запатрабавалі за дзесяць дзён наладзіць тэхнічнае абслугоўваньне шматкватэрных дамоў.

У Менску пачаліся Дні Эўропы. Іх арганізавалі дыпляматычныя місіі краінаў Эўрапейскага зьвязу і краінаў-кандыдатаў на далучэньне да Зьвязу, пры падтрымцы Эўракамісіі. Ад сёньняшняга дня й да канца тыдня ў сталіцы Беларусі пройдзе мноства імпрэзаў.

КДБ просіць разгледзець сваю просьбу на партактыве. Супрацоўнікі КДБ выклікалі на размову кіраўніка Берасьцейскай абласной арганізацыі Партыі БНФ Юрася Губарэвіча. Яго азнаёмілі з 342 і 369 артыкуламі Крымінальнага кодэксу (дзеяньні, якія груба парушаюць правы грамадзянаў, а таксама дзеяньні, якія дыскрэдытуюць Рэспубліку Беларусь). Супрацоўнікі КДБ папрасілі спадара Губарэвіча давесьці да актывістаў Партыі БНФ, каб тыя не парушалі крымінальных артыкулаў.

Чарнагорыя галасуе за незалежнасьць. У Чарнагорыі працягваецца поўнае напружанасьці чаканьне афіцыйных вынікаў рэфэрэндуму ў пытаньні незалежнасьці рэспублікі. Згодна з папярэднімі вынікамі галасаваньня, 55,4% чарнагорцаў прагаласавалі за незалежнасьць. Гэта ўсяго толькі чатыры дзясятыя працэнта вышэй устаноўленай плянкі – 55%, пры якой Эўразьвяз гатовы прызнаць незалежнасьць Чарнагорыі.

Людзі

З. Пазьняк: “Змаганьне Плешчанкі было найбольш блізкім да мэтаду Гандзі. Гэта вялікая страта для нас, для Народнага Фронту, і для Беларусі. Уладзімер Плешчанка быў сапраўдны змагар, які паказаў, як можна невялікімі сіламі зрабіць шмат. Ён даў прыклад, як абараніць гонар Беларусі, як можа адзін чалавек паставіць сябе ў барацьбе. Гэта была Асоба. Ягоны мэтад змаганьня быў найбольш блізкі да мэтаду Гандзі. Ён ня меў маёмасьці, і кожны дзень з невялікай групай людзей ён ехаў Віцебск, у цэнтры гораду раздаваў беларускую літаратуру, газэты, фронтаўскія ўлёткі, пад бел-чырвона-белым сьцягам, з адпаведнымі лёзунгамі.

Пракуратура вынесла папярэджаньне А.Мілінкевічу. Палітыка папярэдзілі аб тым, што сваімі выказваньнямі ў замежным друку ён нібыта дыскрэдытуе Рэспубліку Беларусь. Аляксандар Мілінкевіч заявіў, што ня спыніць сваёй дзейнасьці й ня будзе адмаўляцца ад інтэрвію замежным выданьням.

М.Аўтуховіч пагражае перайсьці да сухой галадоўкі. Сёньня споўнілася сорак дзён з таго часу, як ваўкавыскі прадпрымальнік Мікалай Аўтуховіч абвясьціў за кратамі галадоўку. Яго ўтрымліваюць у сьледчым ізалятары гарадзенскай турмы. Сёньня на судзе Мікалай Аўтуховіч падаў судзьдзі Мікалаю Рачынскаму хадайніцтва аб зьмене яму меры стрыманьня ў сувязі з пагаршэньнем здароўя у выніку галадоўкі.

Абвесткі

Новы конкурс – «Фота Свабоды». «Фота Свабоды» – Ваш погляд на беларускае жыццё. Дасылайце (з кароткім апісаннем – што, дзе, калі) здымкі падзеяў, сітуацыяў, людзей на адрас svaboda@rferl.org з пазнакай “fota Svabody”. Падрабязнасці на www.svaboda.org

Спампаваць версію для друку (PDF)