Навіны і апошнія падзеі. Беларусь

Навіны выбараў. Віцебск №013

Падзеі

155 тысяч штрафу далі назіральніку з Гарадка Леаніду Гарвому. Скаргу на яго напісала старшыня выбарчай камісіі спн. Палянічка. Ёй не спадабалася, што назіральнік Гаравы фатаграфуе факты парушэньняў на выбарчым участку, запісвае камэнтары на дыктафон і час ад часу ходзіць па памяшканьні, не жадаючы стала сядзець на пастаўленым для яго крэсьле. Гарадоцкі раённы суд падтрымаў толькі апошнюю ейную прэтэнзію, пакараўшы Леаніда Гаравога за тое, што ён падыходзіў да стала з дакумэнтамі, пакуль за ім не было сябраў камісіі. А фатаграфаваць і запісваць нешта на дыктафон назіральнікі, як высьветлілася, маюць поўнае права. Можа, варта скарыстацца?

Цытаты

Асьцярожна! Па вас таксама могуць прыехаць! “Ва ўчастковую камісію могуць зьвярнуцца і суседзі выбарца, які, да прыкладу, з прычыны нездароўя ня можа прыйсьці галасаваць на ўчастак, каб ад імя гэтага чалавека папрасіць прыехаць да яго на дом”. Газэта “Віцьбічы” ад 18.03.2006 г.

Людзі

Маці і жонкі арыштаваных апазыцыянэраў склалі зварот да кіраўнікоў усіх дзяржаў і парлямэнтаў. Напярэдадні 19-га сакавіка яны напісалі : “Зьвяртаючыся да вас, мы заяўляем, што далейшыя загады і распараджэньні Лукашэнкі могуць прывесьці да непапраўнай трагедыі. Імкнучыся ўтрымаць уладу, ён хоча адабраць у нас самае дарагое – жыцьці нашых дзяцей і мужоў”. Пад гэтымі словамі падпісаліся і прадстаўніцы Віцебшчыны: Натальля Смолікава (жонка Кастуся Смолікава, асуджанага на 4 сутак), Яўгенія Берасьнева і Ганна Леўчанкава (жонкі Васіля Берасьнева і Васіля Леўчанкава, асуджаных на 7 сутак кіраўнікоў аршанскіх штабоў Казуліна і Мілінкевіча), Тацьцяна Севярынец, маці палітвязьня Паўла Севярынца, асуджанага на 2,5 гады “хіміі” ды інш.

Факты

З Віцебскага медычнага ўніверсітэту паступілі зьвесткі, пра тое, што некалькі дзесяткаў студэнтаў, актывістаў БРСМу, увайшлі ў “групу супраціву”, якая мусіць паехаць 19-га сакавіка ў Менск, каб абараняць Лукашэнку. Маладых людзей нават здымалі з заняткаў на адмысловыя трэніроўкі. Кажуць, што ў гэтую групу ўваходзіць і сын былога рэктара Аляксандра Косінца, які нядаўна атрымаў падвышэньне – зрабіўся віцэ-прэм”ерам і пераехаў у Менск.

Абвесткі

Каб выказаць сваю грамадзкую пазыцыю, неабавязкова ехаць у Менск! Прыходзьце ўвечары 19-га сакавіка на Плошчу Свабоды ў Віцебску. Месца і час на глядзіце нашым сайце заўтра ў 10.00

Спампаваць версію для друку (PDF)

Mar. 18, 2006 // 01:30 | Каментары (0)

Навіны выбараў. Беларусь №013

Падзеі

15 тысяч чалавек віталі рок-музыкаў і Аляксандра Мілінкевіча. Каля 15 тысяч чалавек прыйшлі сёння на плошчу Бангалор на вялікі канцэрт беларускіх музыкаў супольна з сустрэчай адзінага кандыдата ад дэмакратычных сілаў Аляксандра Мілінкевіча. Канцэрт прайшоў пад споклічам «ЗА СВАБОДУ». Павітаць музыкаў і моладзь, якая прыйшла на канцэрт, прыйшоў кандыдат у прэзідэнты Аляксандр Мілінкевіч.

У Ваўкавыску затрыманы рэдактар газэты. Андрэя Шантаровіча — галоўнага рэдактара “Местной газеты” сёньня затрымалі ў горадзе на вул.Чырвонаармейскай. Пад’ехала міліцэйская машына, зь яе выйшлі два міліцыянты і забралі яго. Андрэй пасьпеў паведаміць па тэлефоне сябрам, што яго даставілі ў РАУС, пасьля гэтага сувязь абарвалася.

Ператрус у кватэры намесьніка старшыні БНФ А. Міхалевіча. Паводле інфармацыі Алеся Міхалевіча, у кватэру ўварваліся міліцыянты і супрацоўнікі КДБ. У памяшканьні час ад часу ладзяць сустрэчы прадстаўнікі дэмакратычнага руху, у тым ліку сябры юрыдычна зьліквідаванага ўладмі “Задзіночаньня беларускіх студэнтаў”.

Цытаты

Заўтра Беларусь паўстане на гістарычным раздарожжы, і ад нас з вамі будзе залежаць, куды яна скіруецца. Свабода, праўда, справядлівасць, дэмакратыя, незалежнасць – вось тыя каштоўнасці, да якіх яна павінна імкнуцца. Толькі разам, сумесна мы зможам гэта рэалізаваць. А. Мілінкевіч, кандыдат у Прэзідэнты

Нужно сброситься на ракету и отправить Лукашенко в космос! А. Казулін, кандыдат у Прэзідэнты

Людзі

Януша Анышкевіча не пусьцілі ў Беларусь. Насуперак ранейшай інфармацыі з офісу віцэ-сьпікера Эўрапейскага парлямэнту Януша Анышкевіча аб тым, што ён адмаўляецца ад паездкі ў Менск, сёньня ўвечары спадар Анышкевіч усё ж накіраваўся ў Беларусь, аднак ва ўезьдзе ў краіну яму было адмоўлена.

Абвесткі

19 сакавіка ў 20:00 святкуем перамогу разам на Кастрычніцкай плошчы ў Менску. На плошчу прыйдуць абодва кандыдаты ў прэзідэнты — А. Казулін і А, Мілінкевіч. Бярыце з сабой кветкі і надзіманыя шарыкі. Будзе весела.

Спампаваць версію для друку (PDF)

Mar. 18, 2006 // 01:35 | Каментары (1)